నదీసుందరి!

నదీసుందరి!...... అబ్బూరి రామకృష్ణరావు

.

పూవుపొడితో పసుపుబూసుక

కావియిగురుల కాంతు లద్దుక

త్రోవ లెఱిగిన చరణములతో

రావె! సంధ్యాకామినీ!

ఉదయకన్యలు కలశములతో

పిదికి పంపిన యాలమందల

పొదుగులను క్షీరముల నింపితి

గదవె! సంధ్యాకామినీ!

పచ్చిమాలతి యాకుమడుపులు

గ్రుచ్చి వేసిన పూలదండలు

తెచ్చియుంచితి మొక్కమా రిటు

వచ్చిపో! సంధ్యాంగనా!

నల్లనల్లని కలువదండల

నెల్లదిశలను నిదుర నెలతలు

అల్లిపోవక మునుపె యమృతము

చల్లిపో! సంధ్యాంగనా!

ఎవరిపై నీవలపు నిలిపితి?

వెవరికై యీపారవశ్యము?

భువనభువనము లెల్ల తిరిగెద

వవుర! సంధ్యాకామినీ!

ఉదయమున వెలిచీరచాటున

కొదమసంజల కావిముసుగున

పొదలునది నీవొకతెవేనా?

ఉదయ సంధ్యాకామినీ!