మన్మధ పూజావిధానం! (ఆచార్య చొప్పకట్ల సత్యనారయణ గారు.)

మన్మధ పూజావిధానం! 

(ఆచార్య చొప్పకట్ల సత్యనారయణ గారు.)

ఆంధ్ర ప్రబంధాలలో మన్మధోపాలంభనం విన్నాం.చూశాం.కానీ మన్మధ పూజావిధానం గురించి యెవ్వరూ ప్రస్తావించలేదు. ఆలోటు తీర్చనెంచారు కాబోలు ,మన రామరాజ భూషణుడు వారివసుచరిత్రలో మన్మధపూజను సాంగోపాంగంగా కావ్యనాయిక గిరికచే నిర్వహింపజేశారు. అపూర్వమైన ఆవిశేషాన్ని మీముందుంచాలని నాయీ ప్రయత్నం.సమాహితులై చిత్తగించండి!

గిరిక వసురాజును ప్రధమపరిచయంలోనే ప్రేమిస్తుంది. ఆయనేమో వచ్చినట్లేవచ్చి ఆమెచ్తిత్తంలో ముద్రవైచి రాజధానికి వెడలిపోయాడు. అక్కటితోఃఆమెకు విరహం ప్రారంభమయ్యింది. ఉపశమనంకోసం వన విహారానికి వెళుతుంది. ఆవసంతశోభలు, ఆమలయమారుతం, వగైరా వగైరా ఆమెబాధను మరింతగా పెంచుతాయి. దాంతో చెలికత్తెలు కర్తవ్యోపదేశంచేశారు. మన్మధపూజ చేయమని. అందుకామె యుపక్రమించింది.

ఉ: గొజ్జగి మంచునం దడిపిఁగూర్చిన పుప్పొడి తిన్నెమీద, లా 

మజ్జక కాయమాన లసమాన విమానముక్రింద నొక్క పూ 

సెజ్జ ఘటించి, యందొక కుశేశయ కర్ణిక నుంచి, యందు సం 

పజ్జలజేక్షణాసుతుని భావమువ్రాసి ,కురంగనాభికన్;

పూజకు కావలసిన యేర్పాట్లు చేశారు.యిలా! మంచుతోగూడిన గులాబీలనీటితో(పన్నీటితో)పుప్పొడితడిపి, పూజావేదిక తయారు చేసి, దానిపై వట్టివేళ్ళతో పందిరి వేసి, ఆవేదికపై నొక పూసెజ్జను అమర్చి, దానిపై నొకతామర బొడ్డు నుంచి, దానిపై మన్మధునిరేఖాచిత్రమును కస్తురితో లిఖించి దానిని పూజాస్థానమున నుంచినారు.

మన్మధుడు సాంగ సపరివార పత్నీ మిత్ర సమేతుడైయుండాలిగదా!

తే: అతని వామాంకమున రతినావహించి , 

మ్రోల నుడురాజు ఋతురాజుఁ గీలు కొలిపి, 

క్రేవల సగంధపవన కోకిల మరాళ 

కీర సారంగముల వ్రాసి, చేరిృచెలులు;

అతని యెడమవైపు రతీదేవిని,ప్రక్కలయందు వసంత చంద్రులను, అటుప్రక్కన మలయమారుతమును, కోకిలములను,హంసలను,చిలుకలను,తుమ్మెదలను, పొందుపరిచారట! అక్కడ నుండి ఆవాహనతో ప్రారంభమైనపూజ అంగరంగ వైభవంగా కొనసాగుతుంది. వారి మంత్రాలు వినితీర వలసినదే!

కం: కామ! కమలాస్త్ర! కమలా 

కాముకసుత! కామనియక నిధీ! యనుచున్ 

కోమలులు విన్నవించిరి 

కోమల కూకూయ మాన కోకిల ఫణితిన్!

యెలకోయిలలు గొతెత్తికూసినట్లున్నదట!వారిమంత్రోఛ్ఛారణ. కోియిల ఆయన పరివారంగదా!అందుకు.వయస్సులోఉన్న ఆడపిల్లల కంఠంఅలాఉంటే బాగుంటుందని వ్యగ్యం!

స్వామీ వసంతుడు నీపరివారంలోవాడు, కోకిలలా నీకాహళులు.యిక్కడున్న పత్రం ,పుష్పం ఫలం,మొదలగునవి యన్నీ నీవే! యికనీకేమియవ్వగలం? శీతాంశునకు అమృతార్పణ మనునట్టు, నీదేనీకీయక తప్పదు స్వీకరించి యనుగ్రహింపుమని ప్రార్ధనాపూర్వక నమస్కారముతో పూజముగించినారు.

ఇదీ మన్మధపూజా విధాన కథ!