విశ్వప్రేమ (కరుణశ్రీ)

విశ్వప్రేమ 

(కరుణశ్రీ)

సీ. 

ఏ ప్రేమ మహిమచే నీ ధారుణీచక్ర 

మిరుసు లేకుండనే తిరుగుచుండు 

ఏ ప్రేమమహిమచే నెల్ల నక్షత్రాలు 

నేల రాలక మింట నిలిచియుండు 

ఏ ప్రేమమహిమచే పృథివిపై బడకుండ 

కడలిరాయుడు కాళ్ళు ముడుచుకొనును 

ఏ ప్రేమమహిమచే నీ రేడు భువనాల 

గాలిదేవుడు సురటీలు విసరు 

గీ. 

ఆ మహాప్రేమ - శాశ్వతమైన ప్రేమ - 

అద్భుత మఖండ మవ్యక్తమైన ప్రేమ - 

నిండియున్నది బ్రహ్మాండభాండమెల్ల 

ప్రేయసీ ! సృష్టియంతయు ప్రేమ మయము ! !