అమ్మ!

అమ్మ!

.

(మా సోదరి..శ్రీమతి తరంకంటిసుర్యలక్ష్మికవిత .)

.

1. అవనిలోన అమ్మ ఆరాద్య దైవము 

దైవ మనగ అమ్మ. అమ్మ గురువు.

ఉగ్గుపాల తోటె ఊసులెన్నొ జెప్పు

ఆటపాట లన్ని అమ్మ నేర్పు.

.

2. లాల పోయు వేళ లాలించు చక్కగా 

బువ్వ పెట్టు వేళ బుజ్జ గించు 

జోల పాడి కథలు జెప్పి నిదురబుచ్చు 

అమ్మ కెవరు సాటి రారు. 

.

3. అమ్మ చూపులన్ని ఆశీర్వచనములు 

తేనె లొల్కు అమ్మ తెలుపు మాట 

అలుపు లేని బాట అమ్మ నడుపు బాట 

అమ్మ కెవరు సాటి అమ్మ గాక.

.

4. అమ్మ వున్ననాడె అమ్మాయి పుట్టిల్లు 

కష్ట సుఖములు విను కన్న తల్లి

అడవి రోదనంబు అమ్మలేని బతుకు 

అమ్మ కన్న మిన్న అవని లేరు. 

.

5. అందహీనుడైన అవటివాడైనను 

అమ్మకెంతో ముద్దు అమ్మ బిడ్డ 

కన్న బిడ్డ కేమి కష్టమొచ్చిన గాని

తల్లడిల్లి పొవు తల్లి మనసు.

.

6. దొంగ యైన గాని దొరబాబు యైనను 

అమ్మ కూడు బెట్టు ఆకలెరిగి 

ఆదరంబు జూపు అమ్మ ఎల్లప్పుడు

దైవ మనగ వేరు దైవ మెవరు?

.

7. బిడ్డ కడుపు తడుము బిడ్డ డింటికి జేర 

అన్నమింత బెట్టు ఆక లెరిగి 

అన్నపూర్ణ యనగ అమ్మనే యనవచ్చు 

అమ్మ చేతివంట అమృత మోగ.

.

8. అమ్మ పెంపులొనె అనురాగమమతలు

బిడ్డ అమ్మ యనుచు బిల్వగానె 

అమ్మ కన్నులందు ఆనంద బాష్పాలు 

అమ్మ నామ మెంత అద్భుతమ్ము.

.

9. భాగ్యమింత లేక బీదరాలైనను 

కన్నబిడ్డ సుఖము గోరు తల్లి 

కూలి నాలి చేసి కడుపు కట్టుకునైన 

కన్న కడుపు గాన కూడు బెట్టు.

.

10. రోగమొచ్చి నపుడు రామనామ జపమై 

ఆర్తి తోడ మూల్గు "అమ్మ" యనుచు 

బాధ లెన్నొ గలుగ 'అమ్మా అమ్మాయంచు 

అమ్మ నే బిలుతురు "అమ్మ" యనుచు. 

.

11. పూజ్యురాలు అమ్మ. పుదమి జనులకెల్ల 

సమత మమత జూపు సాద్వి అమ్మ 

సహనశీలియె అమ్మ శాంత స్వారూపిణి 

పుణ్య చరిత అమ్మ పృధ్వి లోన.

.

12. ఆర్తి గొన్న వేళ ఆనంద సమయాన 

ఆకలైన వేళ అమ్మ బిలుచు 

తెగని బంధ మనగ తల్లి బిడ్డల దౌను 

దైవమనగ వేరు దైవ మెవరు. 

.

13. బిడ్డలెందరున్న బిడ్డలందరొకటి 

అమ్మకెపుడు లేవు అంతరాలు 

ఎవరికెంత వున్న ఎంచదా తేడాలు 

సరిసమాన గుణము సహజ మనగ.

.

14. అమ్మ మనసెరింగి అమ్మను ప్రేమించు 

జన్మనిచ్చి నట్టి జనని మనకు (ఆమే)

కష్టపెట్ట వద్దు కన్న తల్లి మనసు 

తల్లి ఋణము దీర్ప తరము కాదు.