కృష్ణ శతకము

కృష్ణ శతకము
.
నీవే తల్లివిఁదండ్రివి
నీవే నా తోడు నీడ నీవే సఖుఁడౌ
నీవే గురుఁడవు దైవము
నీవే నా పతియు గతియునిజముగ కృష్ణా!
.
ఓకృష్ణా!నాకు తల్లి,తండ్రి నీవే.నాకు ఎల్లపుడు వెంట ఉండువాడవు, సహాయము, స్నేహితుడు, గురువు, దేవుడు, నీవే నాకు సమస్తము నీవే నాకు దిక్కు.
.
నారాయణ పరమేశ్వర
ధారాధర నీలదేహదానవవైరీ
క్షీరాబ్దిశయన యదుకుల
వీరా నను గావు కరుణవెలయఁగ కృష్ణా!
.
శ్రీమన్నారయణుఁడవు,లోకములన్నింటికి అధిపతివి,రాక్షసులను చంపినవాడవు,పాలసముద్రమందు పవ్వళించిన వాడవు,యదువంశమునందు పుట్టిన వీరుడైన ఓ కృష్ణా!నన్ను దయతో కాపాడుము.
.
హరి యను రెండక్షరములు
హరియించును పాతకముల నంబుజనాభా
హరి నీ నామ మహత్మ్యము
హరి హరి పొగడంగ వశమె హరి శ్రీకృష్ణా!
.
ఓ శ్రీ కృష్ణా!హరియను రెండక్షరములు కలిసిన హరియను నీ పేరే పాపములను పోగొట్టుచున్నది.ఓ పరమేశ్వరా!కృష్ణా నీ నామ మహిమను ఎవ్వరును పొగుడుటకు శక్తులు గారు.