కాళింది లో గోవిందం -

కాళింది లో గోవిందం -( రచన... ఓలేటి శ్రీనివాసభాను...)

ఆడింది ఆడింది పాదం

కాళింది లో గోవిందం

మున్నీట సర్పం - మూడింది దర్పం ...

మిన్నూ-  మన్నూ ఏకం...

ఊగింది లోకం!   ఆడింది .... ఆడింది పాదం ...

గాలీ-నీరూ కాలకూటంగా

వ్రేపల్లె కే సంకటంగా

ఘోరంగా- ప్రాణం పోవంగా

"రంగా.. రంగా" యన్న ఆలకించంగా!  ఆడింది... ఆడింది పాదం...

పడగెత్తి నాగన్న లేవంగా

బుసకొట్టి కోరలు తెరువంగా

వాటంగా- వాలం సాయంగా

నిలువెల్ల మదమంత - నీటను కలువంగ!  ఆడింది ... ఆడింది పాదం

నేత్రం- జలజాతపత్రం

గాత్రం-ఎంతో పవిత్రం

శిఖిపింఛ మౌళి - శ్రీ  బాల శౌరి

చిందులేసిన తీరు చిత్రాతి చిత్రం!  ఆడింది .. ఆడింది పాదం..