గాంధర్వ గానం’!

-

‘గాంధర్వ గానం’!

-

మనసుపెట్టి వినాలే కాని, సృష్టి అంతా నాదమయం!

ప్రతి ధ్వని నుంచి మనకు ‘ఓంకారం’ వినిపిస్తుంది. 

సంగీతానికి ప్రణవమే మూలం. 

అందుకే ‘నేను వేదాల్లో సామవేదాన్ని’ అంటాడు కృష్ణపరమాత్మ. ఆ సామవేదం నుంచే గానం ఆవిర్భవించింది.

.

మొదట గంధర్వులు అభ్యసించడం వల్ల ‘గాంధర్వ గానం’ అనే పేరు వచ్చింది.

. 

చదువుల తల్లి సరస్వతి వీణ పేరు ‘కచ్ఛపి’. ఆ వీణాతంత్రుల నుంచి స్వరాలు వరాలై కురుస్తాయి..

.

మనసుకు, మస్తిష్కానికి- సంగీతమే షడ్రసోపేతమైన విందు భోజనం. మానవ శరీరంలోని నరాల వ్యవస్థను స్పందింపజేసి, చైతన్యం కలిగించే దివ్య ఔషధం అది. శ్రవణ సుందరమైన స్వర పరిపక్వతతో బ్రహ్మీ ముహూర్తంలో చేసే సంకీర్తనం మహావిష్ణువు వీనులకు విందుగా మారుతుందని భక్తులు విశ్వసిస్తారు.

-

భారతీయ శాస్త్రీయ సంగీతానికి పలు ఔషధ గుణాలున్నాయి. జలధిని దాటించే నావ- సంగీతం! అనిర్వచనీయమైన రసానుభూతిని అది కలిగిస్తుంది. భజన, సంకీర్తన, పారాయణం, కచేరి, నృత్యం, నాటకం, హరికథ, యక్షగానం, బుర్రకథ వంటి పాయలుగా చీలి, ఆధ్యాత్మిక సుధా స్రవంతిలా అది ప్రవహిస్తుంది..

.

ముముక్షువుల మోక్ష లక్ష్యసాధనకు సంగీతమే ఉపకరణం. భాష, ప్రాంతం, వర్గం, మతం వంటి ఎల్లలు, హద్దులు సంగీతానికి ఉండవు. ఆ కళ విశ్వజనీనం, సార్వకాలీనం. అన్ని కళల్లోకీ సంగీతమే ఉత్కృష్టమైనది. భక్తి సమన్వితమైన సంగీతామృత సాగరంలో ఓలలాడే ప్రతి జన్మా ధన్యమైనట్లే!